Kabhi yun bhi aa meri aankh me k meri nazar ko khabar na ho
Mujhe aik raat nawaz de, magar us ke baad sehar na ho
Wo bada raheem-o-kareem he mujhe ye sift bhi ata kare
Tujhe bhulne ki dua karoun to meri dua me asar na ho
Mere baazuon mein thaki thaki , abhi mahav-e-khwaab hai chadni
Na uthe sitaron ki paalaki, abi aahaton ka guzar na ho
Ye Gazal ki jaise hiran ki aankhon mein pichhali raat ki chandni
Na bujhe kharabe kii roshani, kabhi becharaag ye ghar na ho
wo firaaq ho yaa visaal ho, teri yaad mahakegi ek din
wo gulab ban ke khilega kyaa, jo chirag ban ke jalaa na ho
Kabhi dhoop de, kabhi badaliyan, dil-o-jaan se dono qubul hain
Magar us nagar mein na qaid kar jahan zindagi ki hawaa na ho
Kabhi din ki dhoop mein jhoom ke kabhi shab ke phool ko chuum ke
Yun hi saath saath chalein sadaa kabhi khatm apna safar na ho
Mere paas mere habib aa zara aur dil ke qareeb aa
Tujhe dhadkanon mein basaa main ke bichadne ka kabhi darr na ho
Bashir Badr
Friday, September 2, 2011
Kabhi Yun Bhi Aa by Bashir Badar
Subscribe to:
Post Comments (Atom)
0 تبصرے:
Post a Comment